गुजरातच्या मुख्यमंत्र्यांनी ड्रॅगन फळाचे नाव ‘कमलम’ ठेवले.

गुजरात सरकारने ड्रॅगन फळाचे नाव बदलण्याचा निर्णय घेतला आहे, आणि त्यानंतर सोशल मीडियावर ट्विटर मीम्स आणि विनोदांचा पुर आला. गुजरातचे मुख्यमंत्री विजय रुपाणी यांनी सांगितले की, त्यांच्या सरकारने ड्रॅगन फ्रूटचे नाव बदलून 'कमलम' करण्याचा निर्णय घेतला आहे.

कच्छ, नवसारी आणि सौराष्ट्रच्या विविध भागात पिकविल्या जाणाऱ्या ड्रॅगन फ्रूटचे नाव बदलून कमलम करण्यासाठी राज्य सरकारने पेटंटसाठी अर्ज केला आहे. विजय रुपाणी म्हणाले, "ड्रॅगन फळ हे नाव योग्य नाही आणि त्याच्या नावामुळे कोणाच्या ही मनात चीनबद्दल विचार येतो, म्हणून आम्ही त्याला कमलम हे नाव दिले आहे," 

ड्रॅगन फळाचे नाव कमलम म्हणून का ठेवले गेले? "शेतकरी म्हणतात की ते कमळासारखे दिसते आणि म्हणूनच आम्ही कमलम असे नाव दिले आहे", असे विजय रुपाणी म्हणाले. ड्रॅगन फ्रूट हा हायलोसेरियस या जातीच्या फळांचा संदर्भ आहे.  

भारताव्यतिरिक्त आग्नेय आशिया, अमेरिका, कॅरिबियन, ऑस्ट्रेलिया आणि मेसोआमेरिका येथे याची लागवड केली जाते. हे फळ गुजरातच्या शुष्क भागात आढळते आणि पौष्टिकतेसाठी ओळखले जाते. हे हिमोग्लोबिन वाढण्यासाठी आणि प्रतिकारशक्ती वाढविण्यास देखील मदत करते.

हे लक्षात घेतले जाऊ शकते की गुजरात आणि देशातील सत्ताधारी पक्षाचे चिन्ह कमळ आहे. गुजरातमधील अहमदाबादमध्ये भाजपाच्या गांधीनगर महामार्गावरील प्रशस्त मुख्यालयाचे नाव देखील श्री कमलम आहे. 

फळाचे नाव बदलणे ही एक राजनैतिक खेळी नसल्याचे मुख्यमंत्र्यांनी सांगितले. मुख्यमंत्र्यांनी पौष्टिक मूल्य आणि किंमती घटकांवरही प्रकाश टाकला कारण बाजारपेठेत हे सर्वात महागडे फळ आहे.